Müsavat Partiyası Məclisinin sədri Arif Hacılı oğlu Orxan və gəlini Yaqutun ABŞ-də həbs edildiyi barədə yayılan məlumatları təkzib edib.
Müsavat Partiyası Məclisinin sədri Arif Hacılı oğlu Orxan və gəlini Yaqut ilə bağlı ABŞ-də yayılan həbs xəbərlərinə açıqlıq gətirib. O bildirib ki, oğlu və gəlini ümumiyyətlə həbs olunmayıb, onlar hazırda sığınacaqda da deyillər.
ABŞ-də ölkədə olan, lakin sığınacağı olmayan şəxslər haqqında müəyyən araşdırmalar aparılıb. Oğlum və gəlinimlə bağlı məsələ də bu qəbildəndir. Bunu həbs adlandırmaq doğru deyil.
Arif Hacılının sözlərinə görə, bir müddət əvvəl oğlu və gəlininin vizalarının müddəti bitdiyinə görə onlar barədə araşdırma aparılıb, lakin həmin məsələ artıq öz həllini tapıb.
Heç sığınacaqda da deyillər. Müəyyən dövrdə onların vizalarının vaxtının keçməsi ilə əlaqədar araşdırmalar olub və məsələ başa çatıb. Əslində bu hadisə sentyabrın əvvəllərində olub. Hər gün onlarla telefonla danışıram, bütün sənəd məsələləri həll olunub. Saxta sənəd hazırlanması kimi yayılan xəbərlər tamamilə uydurmadır.
Arif Hacılı əlavə edib ki, ABŞ-də mövcud vəziyyətlə əlaqədar sığınacaq statusu olmayan hər kəsin istintaqa cəlb olunması mümkündür və oğlu ilə gəlini də məhz bu kontekstdə araşdırmaya cəlb edilib.
Onlar da bu kontekstdə istintaqa cəlb olunmuşdular. Sadəcə, onlar hələ də bu ölkədə daimi yaşamaq hüququ əldə etməyiblər.
Qeyd edilir ki, Arif Hacılının oğlu və gəlininin ABŞ-də həbs edildiyi barədə iddialar yayılmışdı. Bildirilirdi ki, onlar ölkədən çıxmaq öhdəliyi götürsələr də, ABŞ-də qeyri-qanuni yaşamağa davam ediblər.
