Tacikistanın İqtisadi İnkişaf və Ticarət naziri Abdurahmon Abdurahmonzoda bildirib ki, dənizə çıxışı olmayan ölkə üçün nəqliyyat və ticarət əlaqələrinin inkişafı xüsusi əhəmiyyət kəsb edir.
Tacikistanın İqtisadi İnkişaf və Ticarət naziri Abdurahmon Abdurahmonzoda ölkəsinin nəqliyyat və ticarət sahəsindəki strateji maraqlarından danışıb. Onun sözlərinə görə, dənizə çıxışı olmayan Tacikistan üçün bu istiqamətlərin inkişafı böyük əhəmiyyət kəsb edir.
Nazir bu fikirləri İkinci Azərbaycan Beynəlxalq İnvestisiya Forumu çərçivəsində keçirilən sessiyadakı çıxışında səsləndirib.
“Dənizə çıxışı olmayan bir ölkə kimi Tacikistan üçün nəqliyyat və ticarət əlaqələrinin inkişafı xüsusi əhəmiyyət daşıyır. Bu səbəbdən biz regional nəqliyyat dəhlizlərinin daha da genişləndirilməsində, ticarət prosedurlarının sadələşdirilməsində, Mərkəzi Asiya, Çin, Cənubi Asiya, MDB ölkələri və digər regionların bazarları ilə əlaqələrin möhkəmləndirilməsində maraqlıyıq”.
Abdurahmonzoda qeyd edib ki, hazırkı qlobal qeyri-müəyyənlik şəraitində yalnız bir istiqamətə və ya bir tərəfdaşa əsaslanmaqla iqtisadi dözümlülüyə nail olmaq mümkün deyil. Bu baxımdan Tacikistan xarici iqtisadi əlaqələrini ardıcıl şəkildə müxtəlifləşdirir.
“Biz anlayırıq ki, qlobal qeyri-müəyyənlik mühitində iqtisadi dözümlülüyə yalnız tək bir istiqamətə və ya tək bir tərəfdaşa arxalanmaqla nail olmaq mümkün deyil. Məhz buna görə də Tacikistan xarici iqtisadi əlaqələrini ardıcıl olaraq diversifikasiya edir və ticarət müstəvisində, eləcə də investisiya tərəfdaşları şəbəkəsini genişləndirməyə çalışır.”
Nazir əlavə edib ki, ölkəsi üçün beynəlxalq əməkdaşlıq sadəcə mövcud çətinliklərin aradan qaldırılması vasitəsi deyil, iqtisadi inkişafın uzunmüddətli təməlidir.
Abdurahmonzoda bildirib ki, Tacikistan ticarət, nəqliyyat, energetika, rəqəmsal iqtisadiyyat və sənaye sahələrində yeni tərəfdaşlıqlara və birgə investisiya layihələrinə açıqdır.
“Biz yeni tərəfdaşlıqlara və birgə investisiya layihələrinə, həmçinin ticarət, nəqliyyat, energetika, rəqəmsal iqtisadiyyat və sənaye sahəsində əməkdaşlığın genişləndirilməsinə açığıq. Məqsədimiz sadəcə qlobal iqtisadiyyatda baş verən dəyişikliklərə uyğunlaşmaq deyil, bu dəyişiklikləri Tacikistanın iqtisadi transformasiyasını sürətləndirmək, iqtisadiyyatımızın rəqabət qabiliyyətini artırmaq, davamlı artımı və xalqımız üçün daha böyük imkanları təmin etmək üçün bir təkan kimi istifadə etməkdir”.
Nazirin sözlərinə görə, məqsəd təkcə qlobal iqtisadi dəyişikliklərə reaksiya vermək deyil, bu dəyişiklikləri ölkənin transformasiyasını sürətləndirmək üçün bir vasitəyə çevirməkdir.
