Azərbaycan əsilli müğənni Coni (Jony) şəxsi həyatı və adının dəyişdirilməsi ilə bağlı yayılan xəbərlərin əslində texnologiya ilə aparılan bir təcrübə olduğunu açıqlayıb.
Azərbaycan əsilli tanınmış müğənni Coni sosial şəbəkə hesabında yaydığı videoda öz adı ətrafında dolaşan şayiələrə münasibət bildirib. Sənətçi bildirib ki, son həftələrdə şəxsi həyatı və adının dəyişdirilməsi ilə bağlı yayılan görüntü və xəbərlər əslində texnologiyaların gücünü nümayiş etdirmək üçün hazırlanmış bir təcrübədir.
Coni bildirib ki, ona və komandasına qısa müddət ərzində yüzlərlə müraciət və zəng daxil olub.
“Son bir həftə ərzində mənə və komandama haqqımda yayılan xəbərlərə hansısa şəkildə reaksiya vermək xahişi ilə yüzlərlə zəng gəldi. Bəli, oxudum. Həyat yoldaşı və uşaq, yeni ad. Yeri gəlmişkən, xoşuma gəldi. Gözəldir”, - deyə o qeyd edib.
Sənətçinin sözlərinə görə, məqsəd insanlara müasir dövrdə həqiqi məzmunu süni yolla yaradılmış materiallardan ayırmağın nə dərəcədə çətinləşdiyini göstərmək olub.
Coni çıxışında müasir cəmiyyətin şübhə hissini itirdiyini vurğulayıb və insanların gördükləri hər şəklə, eşitdikləri hər səsə sual vermədən inandığını bildirib.
“Bilirsiniz, dövrümüzün əsas problemi nədədir? Biz şübhə etməyi unutmuşuq. Biz bir şəkil görürük və dərhal ona inanırıq. Siz mənim səsimə bənzər bir səs eşidirsiniz və saniyələr içində mənə qarşı iddia irəli sürməyə və ya üstümə yarlıq yapışdırmağa hazır olursunuz. Dünya o dərəcədə sürətlənib ki, həqiqət artıq dəyər olmaqdan çıxıb. Amma mən sizə etiraf etmək istəyirəm. Bütün bu söz-söhbət, bütün bu performans, bu xəbərlər - bu sadəcə zarafat deyil. Bu güzgüdür. Elə indi, mən danışarkən, texnologiyalar mənim üzümü, səsimi oğurlaya bilər. Siz isə surəti orijinaldan ayırd edə bilməzsiniz. Biz elə bir dünyada yaşayırıq ki, kompüteri olan istənilən məktəbli həqiqətdən daha inandırıcı bir reallıq yarada bilər. Həyat illuziyadır”, - müğənni əlavə edib.
Paylaşımın sonunda Coni ekranda görünüş dəyişikliyi ilə onunla birgə “Illusion” adlı mahnı üzərində işləyən italiyalı müğənni və aktyor Mikele Morroneyə çevrilib.
Qeyd edək ki, son günlərdə sosial şəbəkələrdə Coninin gizli saxladığı bir həyat yoldaşı və övladının olduğu, həmçinin adını və soyadını dəyişdiyi barədə müxtəlif görüntü və xəbərlər yayılmışdı.
