Akademik Milli Dram Teatrının aparıcı aktrisası, Əməkdar artist Hicran Nəsirova bildirib ki, sümüyündən analiz götürülərkən ombasının sındırılması onun sağlamlığını ağırlaşdırıb.
Akademik Milli Dram Teatrının aparıcı aktrisası, Əməkdar artist Hicran Nəsirova açıqlama verərək bildirib ki, tibbi müayinə zamanı baş verən xəta onu ağır vəziyyətə salıb. Aktrisanın sözlərinə görə, sümüyündən analiz götürülərkən omba sümüyü sındırılıb və bu, onun onkoloji xəstəliyi ilə birləşərək sağlamlığını daha da pisləşdirib.
“Həkimlər sümüyümdən analiz götürəndə ombamı sındırdılar. Həm onkoloji xəstəlik, həm də sınıq üst-üstə gəldi. Məni onlar xəstə etdi. Həkim səhlənkarlığı ucbatından bu günə qaldım. Sümüyümdən 3 dəfə sümük qopartdılar. Yaşlı adamam da, sümük nə qədər tab gətirə bilər?! Bu mənim canımdan qopur da. Sınıq ağrısı necə ola bilər? Barmaqlarımdan ayaqlarıma qədər ağrıyıram”.
Nəsirova qeyd edib ki, sonradan müayinə üçün müraciət etdiyi Türkiyədə iki həkim onun sınığını görüb və vəziyyəti izah etməsini istəyib. Aktrisanın sözlərinə görə, həkimlər analiz zamanı belə bir zədənin necə yarana biləcəyinə inana bilməyiblər.
“Türkiyədə iki həkim sınığı gördü və ilk sualı bu oldu ki, yıxılmısan?! Dedim ki, yox. Soruşdular ki, bəs bu sınıq hardandır?! Dedim ki, analiz götürəndə sındırıblar. Həkimlərin gözü kəlləsinə çıxdı ki, belə analiz götürərlər?! Çəkici elə vurublar ki, sümük sınıb. Onsuz da sümüyüm ovulub gedir. Bir tərəfdən də həmin yerdə onkologiya var, o da sümüyü məhv edir. Mənə ayda 1 dəfə sümük iynəsi vurulur. O özü 800 eurodur. İndi görün də. Deməsinlər ki, təqaüd alır, pensiya alır. Vallah hamısı dərmana, iynəyə gedir”.
Aktrisa bildirib ki, hazırda vaxtının böyük hissəsini evdə keçirir və teatr fəaliyyətindən uzaq qalmağın çətinliyini yaşayır. O deyib ki, meslektaşlarından Xalq artisti Səidə Quliyeva onunla mütəmadi əlaqə saxlayır, digərləri isə vaxtaşırı zəng edir.
“Xalq artisti Səidə Quliyeva vaxtaşırı mənimlə əlaqə saxlayır. Digərləri də yadlarına düşəndə zəng edirlər. Heç kimi qınamıram da. Hər kəsin işi-gücü var, məşq edirlər, ailələri ilə məşğul olurlar. İndi heç sənət də yada düşmür. Heç nə gözümdə deyil. Əvvəl heyfislənirdim ki, yaş gedir, mən çatdırmadım, bu rolu mənə vermədilər. İndi canımla əlləşirəm. Hamıya can sağlığı arzulayıram. Aktyorluq elə bir sənətdir ki, orada mütləq sağlamlıq lazımdır. Hazırda nəvələrimlə günümü keçirirəm. Oturub-dura bilmirəm. Balaca nəvəmin 4 yaşı var. Deyir ki, “nənə, gəl sənə kömək edim, otur-dur”. Onlardan bir az stimul alıram”.
