Sentyabrın 25-də Baş prokuror Kamran Əliyevin rəhbərliyi ilə 27 sentyabr Anım günü və 1 oktyabr prokurorluq işçilərinin peşə bayramı münasibətilə prokurorluğun veteranları, Vətən müharibəsi iştirakçıları və şəhid ailələri ilə görüş təşkil olunub.
Sentyabrın 25-də Baş prokuror Kamran Əliyevin rəhbərliyi ilə Azərbaycan Respublikası Prokurorluğunun veteranları, Vətən müharibəsində iştirak etmiş prokurorluq əməkdaşları, həmçinin I və II Qarabağ müharibələrində şəhid olmuş prokurorluq əməkdaşlarının ailə üzvləri ilə görüş baş tutub. Tədbir 27 sentyabr Anım günü və 1 oktyabr - prokurorluq işçilərinin peşə bayramı münasibətilə keçirilib.
Görüşün əvvəlində ulu öndər Heydər Əliyevin, həmçinin ölkənin ərazi bütövlüyü və suverenliyi uğrunda həlak olmuş şəhidlərin xatirəsi bir dəqiqəlik sükutla yad edilib.
Tədbirdə çıxış edən Kamran Əliyev bildirib ki, Heydər Əliyevin qoyduğu dövlətçilik kursu bu gün Prezident İlham Əliyev tərəfindən uğurla davam etdirilir. Onun sözlərinə görə, ardıcıl dövlət siyasəti sayəsində ölkənin müdafiə qüdrəti gücləndirilib və ərazi bütövlüyünün bərpası istiqamətində mühüm addımlar atılıb.
Qeyd olunub ki, 44 günlük Vətən müharibəsi nəticəsində torpaqların işğalına son qoyulub. Azərbaycan Ordusunun Zəfəri ölkənin ərazi bütövlüyünün bərpasını təmin edib, 2023-cü ilin sentyabrında keçirilmiş lokal antiterror tədbirləri isə suverenliyin tam bərpasına gətirib çıxarıb.
Baş prokuror vurğulayıb ki, bu nailiyyətlər şəhid və qazilərin qəhrəmanlığı, xalqın həmrəyliyi və dövlətin gücü sayəsində mümkün olub. O, həmçinin bildirib ki, Prezident İlham Əliyevin rəhbərliyi ilə azad edilmiş ərazilərdə geniş bərpa-quruculuq işləri aparılır, məcburi köçkünlərin doğma yurdlarına qayıdışı və infrastrukturun yaradılması əsas vəzifələr sırasındadır.
Görüşdə Vətən müharibəsi iştirakçısı olmuş prokurorluq əməkdaşlarının döyüş şücaəti xüsusi qeyd olunub. I və II Qarabağ müharibələrində həlak olmuş prokurorluq əməkdaşlarının fədakarlığının unudulmayacağı bildirilib.
Tədbirdə sabiq Baş prokuror İsmət Qayıbovun oğlu, Baş Prokurorluğun Hüquqi təminat və insan hüquqları məsələləri idarəsinin rəis müavini İsmayıl Qayıbov çıxış edib. Onunla yanaşı, prokurorluğun veteranı Seyfulla Aslanov, Bakı Hərbi Prokurorluğunun müstəntiqi, Vətən müharibəsi iştirakçısı Ayxan Əhmədov, Sumqayıt Şəhər Prokurorluğunun müstəntiqi Xalıq Dadaşzadə və müharibə zamanı xəsarət almış Baş prokuror yanında Korrupsiyaya qarşı Mübarizə Baş İdarəsinin prokuroru Ozal Həsənov da söz alıblar.
Çıxış edənlər Prezident İlham Əliyev və Birinci vitse-prezident Mehriban Əliyevanın şəhid ailələrinə və müharibə iştirakçılarına göstərdiyi diqqətdən, onların sosial müdafiəsinin yaxşılaşdırılması istiqamətində görülən işlərdən danışıblar və dövlət qayğısından məmnunluqlarını bildiriblər.
Tədbiri yekunlaşdıran Kamran Əliyev şəhid ailələrinin sosial müdafiəsinin gücləndirilməsi, onların müraciət və qayğılarının daim diqqətdə saxlanılması istiqamətində tədbirlərin davam etdiriləcəyini bildirib.
Prokurorluq orqanları şəhid ailələrinə, müharibə iştirakçılarına və prokurorluğun veteranlarına hər zaman dəstək olacaq.
