Prezident İlham Əliyevin himayəsi altında Bakıda İkinci Azərbaycan Beynəlxalq İnvestisiya Forumu (AIIF 2026) öz işinə başlayıb.
Prezident İlham Əliyevin himayəsi altında Bakıda İkinci Azərbaycan Beynəlxalq İnvestisiya Forumu — AIIF 2026 öz fəaliyyətinə start götürüb. Bu ilki tədbir "Parçalanmış dünyada etimadın bərpası: Cənubi Qafqaz qlobal bağlantı və investisiya sabitliyinin dayağı kimi" mövzusuna həsr olunub.
Forum İqtisadiyyat Nazirliyi ilə "The European House – Ambrosetti & TEHA Group" arasındakı strateji tərəfdaşlıq çərçivəsində təşkil olunur və iki gün davam edəcək. Tədbirin təşkilatçıları sırasında nüfuzlu beyin mərkəzləri də yer alıb.
Foruma dünyanın aparıcı investorları, dövlət qurumlarının və beynəlxalq maliyyə institutlarının təmsilçiləri, eləcə də biznes liderləri qatılıb. Tədbir yeni tərəfdaşlıqların qurulması, investisiya axınının artırılması və iqtisadi imkanların genişləndirilməsi üçün əhəmiyyətli platforma rolunu oynayır.
Tədbirin əsas hədəfi konkret layihələr ətrafında tərəfdaşlıqlar formalaşdırmaq və qarşılıqlı faydaya xidmət edən birgə fəaliyyət mexanizmləri yaratmaqdır. Keçiriləcək sessiyalarda qlobal iqtisadi və geosiyasi proseslərin investisiyalara və iqtisadi artıma təsiri araşdırılacaq.
Bundan əlavə, bu proseslər fonunda Azərbaycanın strateji mövqeyi, regional əlaqələndirmə imkanları və müxtəlif sahələr üzrə əməkdaşlıq perspektivləri müzakirə mövzusuna çevriləcək.
Forum çərçivəsində Azərbaycana məxsus qurumların xarici şirkət və tərəfdaşlarla əməkdaşlığa dair sənədlər imzalaması və mübadiləsi planlaşdırılır. Gözlənilir ki, AIIF 2026 yeni investisiya sahələrinin və əməkdaşlıq imkanlarının inkişafına, Azərbaycanın regional iqtisadi bağlantılardakı rolunun artmasına və gələcək layihələrin həyata keçirilməsinə töhfə verəcək.
