Xarici işlər nazirinin müavini Elnur Məmmədov Zəngəzur dəhlizinin Azərbaycana aid hissəsində nəqliyyat infrastrukturunun tamamlanmaq üzrə olduğunu bildirib.
Xarici işlər nazirinin müavini Elnur Məmmədov Zəngəzur dəhlizinin inkişafı istiqamətində mühüm addımların atıldığını açıqlayıb. Onun sözlərinə görə, dəhlizin Azərbaycana aid hissəsində nəqliyyat infrastrukturunun qurulması artıq başa çatmaq üzrədir.
Bu fikirlər İkinci Azərbaycan Beynəlxalq İnvestisiya Forumu çərçivəsində keçirilən "Orta Dəhliz: Ticarət, sənaye və bağlantılılıq potensialının reallaşdırılması" mövzusundakı panel müzakirəsində səslənib. Nazir müavini dəhlizin açılmasının ölkə iqtisadiyyatının inkişafı üçün nə dərəcədə əhəmiyyətli olduğunu vurğulayıb.
“Zəngəzur dəhlizinin Ermənistana aid 42 kilometrlik hissəsində işlər başlandıqda Asiyadan Avropaya yüklər 12-15 günə daşınacaq. İqtisadiyyatların inkişafı baxımından Zəngəzur dəhlizinin açılması önəmlidir”
Elnur Məmmədov çıxışında Azərbaycan-ABŞ münasibətlərinə də toxunub. Onun sözlərinə görə, iki ölkə arasındakı əlaqələr sadəcə formal xarakter daşımır, bu münasibətlər çərçivəsində konkret sənədlər imzalanıb.
“Bu ilin iyununda ilk Azərbaycan-ABŞ iqtisadi dialoqunu keçirdik. Bu dialoq həmin çərçivənin praktiki əməkdaşlığa çevrilməsinə başlanğıc verdi. İyunun əvvəlində keçirilmiş Azərbaycan-ABŞ iqtisadi dialoqu çərçivəsində Amerika şirkətləri bir sıra mühüm razılaşmaları yekunlaşdırdılar. Strateji öhdəliklərin güclü kombinasiyasını formalaşdırarkən qarşıda duran ümumi vəzifə bu dinamikanı davamlı kommersiya tərəfdaşlıqlarına çevirməkdir. Bununla yanaşı, dialoq çərçivəsində kritik minerallar, rəqəmsal infrastruktur və ölkənin mədəniyyəti ilə bağlı əməkdaşlıq sənədləri də hazırlandı. Bunların yalnız hesabatlarda qalmadığını göstərmək üçün bir neçə ay əvvəl imzalanmış konkret sazişlərdən nümunələr gətirim. “Exxon” şirkəti ilə Azərbaycan arasında qeyri-ənənəvi quruda yerləşən neft ehtiyatlarının inteqrasiyası, işlənməsi və hasilatı ilə bağlı Anlaşma Memorandumu imzalanıb. Həmçinin kritik mineralların tədarükünün təmin edilməsi, onların hasilatı və emalı üzrə çərçivə sazişinin hazırlanması istiqamətində iş aparılır”
Nazir müavininin sözlərinə görə, bu addımlar Azərbaycan ilə ABŞ arasındakı iqtisadi əlaqələrin praktiki nəticələrə çevrilməsinə dair əsas nümunələrdəndir.
