Qazax Rayon Psixiatriya Xəstəxanasında yanğın baş verib, nəticədə binada olan 44 pasiyent təhlükəsiz əraziyə köçürülüb.
Səhiyyə Nazirliyinin tabeliyində fəaliyyət göstərən Qazax Rayon Psixiatriya Xəstəxanasında yanğın qeydə alınıb. Hadisə zamanı müəssisədə cəmi 98 nəfər müalicə alırdı.
Alov ikimərtəbəli binanın mətbəx hissəsindən götürülüb. Fövqəladə Hallar Nazirliyinin Qazax Dövlət Yanğından Mühafizə Hissəsinin əməkdaşları qısa müddətdə hadisə yerinə çatıb və yanğını söndürüblər.
Yanğının baş verdiyi mərtəbəyə yaxın yerləşən 44 xəstə operativ şəkildə binadan çıxarılaraq təhlükəsiz zonaya yerləşdirilib. Aparılan tədbirlər nəticəsində heç bir pasiyent xəsarət almayıb.
Xəstəxananın mətbəxi yararsız hala düşdüyündən, ərazidə 50 nəfərlik tutuma malik çadır qurulub və orada müvəqqəti mətbəx fəaliyyətə başlayıb. Bundan əlavə, pasiyentlərin qidalanmasını fasiləsiz təmin etmək məqsədilə 5 günlük ərzaq ehtiyatı formalaşdırılıb.
Yanğının hansı səbəbdən baş verdiyi hazırda hüquq-mühafizə orqanları tərəfindən araşdırılır. Rəsmi qurumlar hadisə ilə bağlı əlavə məlumat açıqlamayıb.
