2011-2012-ci illərdə Yaponiyanın Baş naziri vəzifəsini icra etmiş Yoşihiko Noda, Çiba şəhərindəki Minami-Funabaşi dəmiryol stansiyası qarşısında vətəndaşlara broşür paylayarkən görüntüyə düşüb.
Sosial şəbəkələrdə yayılan görüntülərdə 69 yaşlı siyasətçinin səhər saatlarında stansiya qarşısında tək dayandığı, sərnişinlərlə salamlaşaraq əlindəki broşürləri təqdim etdiyi müşahidə olunur.
Görüntülərdə bəzi vətəndaşların keçmiş Baş naziri tanıyaraq onunla salamlaşdığı və broşürləri qəbul etdiyi göstərilir. Bununla belə, stansiyadan keçən digər insanların bir qismi Nodanı tanımadan yanından ötüb keçib.
Nodanın öz internet səhifəsində yerləşdirdiyi iş cədvəlinə görə, o, sentyabrın 18-də səhər saat 06:30-dan 08:30-dək Çibanın 4-cü seçki dairəsi çərçivəsində Minami-Funabaşi stansiyası qarşısında vətəndaşlarla görüşməli imiş. Məlumata görə, sosial mediada yayılan görüntülər təxminən saat 07:30 radələrində çəkilib.
Keçmiş Baş nazirin sentyabr ayı boyunca səhər saatlarında müxtəlif dəmiryol stansiyalarında vətəndaşlarla görüşmək niyyətində olduğu bildirilir. Noda ənənəvi çıxışlar etmək əvəzinə broşür paylamağı və insanlarla üz-üzə, birbaşa ünsiyyət qurmağı üstün tutduğunu vurğulayıb.
