Bakı Şəhər İcra Hakimiyyəti başçısının tabeliyində fəaliyyət göstərən “Mərkəzi Nəbatat Bağı” və “Dendrologiya Bağı” publik hüquqi şəxsləri birləşdirilərək yeni məhdud məsuliyyətli cəmiyyətə çevrilib.
Bakı Şəhər İcra Hakimiyyəti başçısının tabeliyində olan iki ayrı publik hüquqi şəxs — “Mərkəzi Nəbatat Bağı” və “Dendrologiya Bağı” — artıq vahid struktur kimi fəaliyyət göstərəcək. Bu barədə qərarı Baş nazir Əli Əsədov imzalayıb.
İmzalanan sənədə əsasən, hər iki qurum birləşdirilərək “Mərkəzi Nəbatat və Dendrologiya Bağı” Məhdud Məsuliyyətli Cəmiyyəti adı altında fəaliyyətini davam etdirəcək. Bu addım hər iki bağın idarəçiliyini vahid çərçivəyə salmaq məqsədi daşıyır.
Qərara görə, yeni yaradılan cəmiyyətin işçi heyəti üçün maksimum 230 ştat vahidi müəyyənləşdirilib. Eyni zamanda, cəmiyyətin ümumi yığıncağına aid səlahiyyətlərin icrası bir neçə qurum arasında bölüşdürülüb.
Belə ki, bu səlahiyyətlər Nazirlər Kabinetinə, İqtisadiyyat Nazirliyinə və Bakı Şəhər İcra Hakimiyyətinə həvalə olunub.
