Milli Məclisin İnsan hüquqları komitəsinin iclasında millət vəkili Səyyad Aranın səhiyyə naziri ilə bağlı səsləndirdiyi tənqidi fikirlərə Səhiyyə Nazirliyi rəsmi açıqlama ilə cavab verib.
Milli Məclisin İnsan hüquqları komitəsinin keçirdiyi iclasda millət vəkili Səyyad Aran səhiyyə nazirinin fəaliyyəti ilə bağlı tənqidi fikirlər səsləndirib. Bir müddət sonra Səhiyyə Nazirliyi bu çıxışa münasibət bildirərək açıqlama yayıb.
Açıqlamada bildirilir ki, vətəndaşların qəbulu qabaqcadan təyin olunmuş qrafik üzrə nazir və digər rəhbər vəzifəli şəxslər tərəfindən nazirliyin inzibati binasında aparılır. Həmçinin qeyd edilib ki, qəbulla bağlı bütün lazımi məlumatlar nazirliyin rəsmi internet səhifəsində yerləşdirilib.
“Səhiyyə Nazirliyində vətəndaşların qəbulu müəyyən edilmiş qrafik əsasında nazir və digər rəhbər vəzifəli şəxslər tərəfindən nazirliyin inzibati binasında həyata keçirilir. Nazirliyin rəsmi internet səhifəsində vətəndaş qəbulu ilə bağlı müvafiq məlumatlar yerləşdirilir. Bu baxımdan, sözügedən fikirlərin ictimaiyyət tərəfindən düzgün anlaşılması üçün qeyd olunan səlahiyyət bölgüsünün nəzərə alınması vacibdir”
Xatırladaq ki, Səyyad Aran çıxışında bildirmişdi ki, səhiyyə naziri qəbula gələrkən ətrafda ciddi nəzarət yaradılır və insanların ora yaxınlaşması mümkün olmur. Onun sözlərinə görə, əvvəlcədən nisbətən yumşaq və zərərsiz çıxışları olan şəxslər siyahıya alınıb içəri buraxılır, əsl şikayəti olan vətəndaşlar isə problemlərini birbaşa nazirə çatdıra bilmirlər.
